«Istiqlol» klubi Elit Osiyo Chempionlar ligasidagi uy o‘yinlarini Iroqning Basra shahrida o‘tkazadi. Bu haqda klub matbuot xizmati ma’lum qildi.
Klub xabar berishicha, so‘nggi kunlarda «Istiqlol» rahbariyati Malayziyaga tashrif buyurib, OFK vakillari bilan muzokaralar o‘tkazgan. Uchrashuvlar yakunida jamoaning uy bahslarini Iroqning Basra shahrida o‘tkazish bo‘yicha kelishuvga erishilgan.
Bugun esa OFK ushbu so‘rovni rasman tasdiqladi. Shu tariqa, Basra shahri «Istiqlol»ning Elit Osiyo Chempionlar ligasidagi 4 ta uy uchrashuvini qabul qiladi.
Avvalroq klub Toshkent, Dushanbe va Doha variantlaridan foydalanish imkoniyatidan mahrum bo‘lgani haqida xabar berilgan edi.
Eslatib o‘tamiz, «Istiqlol» tarkibida O‘zbekiston milliy terma jamoasi futbolchilari Rustam Ashurmatov va Jaloliddin Masharipov ham to‘p tepadi.
