Argentina terma jamoasining Xitoyda o‘tkazilishi kutilayotgan o‘rtoqlik uchrashuvlari bekor qilindi. Terma jamoaning sentyabr-oktyabr oylaridagi FIFA kunlari doirasidagi bo‘lajak o‘rtoqlik uchrashuvlari yuzasidan tarqalgan mish-mishlarga aniqlik kiritildi. Mamlakat futbol federasiyasi ijtimoiy tarmoqlardagi sahifasida quyidagicha bayonot berdi:
“Dushanba kuni AFA Lionel Skaloni jamoasining sentyabr va oktyabr oylaridagi FIFA kunlarida o‘tkazadigan o‘rtoqlik uchrashuvlarini e’lon qiladi”.
21-sentyabrdan 6-oktyabrgacha bo‘lib o‘tishi rejalashtirilgan ushbu yig‘in doirasida Argentina terma jamoasi ikki yoki uchta uchrashuv o‘tkazishi kutilmoqda. Jurnalist Esteban Edulning ma’lum qilishicha, o‘yinlar Kordova shahrida va “River Pleyt” klubiga qarashli “Monumental” stadionida bo‘lib o‘tishi mumkin.
Uchrashuvlar e’lon qilinishining kechikishiga AFAning FIFA javobini kutayotgani sabab bo‘lgan. Argentina futbol federasiyasi mazkur bahslar A toifasidagi xalqaro uchrashuvlar sifatida tan olinishi yoki olinmasligi masalasiga aniqlik kiritishni kutmoqda.
Bu masala ayniqsa Jahon chempionati finalidagi voqealar ortidan jazolangan futbolchilar uchun muhim. Chunki A toifasidagi uchrashuvlar diskvalifikasiya muddatini o‘tashda hisobga olinishi mumkin.
Agar FIFA diskvalifikasiya muddatlarini kamaytirish uchun o‘rtoqlik uchrashuvlarini mamlakat tashqarisida o‘tkazishni talab qilsa, Argentina terma jamoasi boshqa davlatda ham maydonga tushishi mumkin.
Jahon chempionati finalida yuz bergan voqealar sabab Leandro Paredes 10 ta, Noel Molina 7 ta, Tiago Almada esa 1 ta uchrashuvga diskvalifikasiya qilingan.
Bugun, 7-avgust kuni Argentina terma jamoasining sentyabr-oktyabr oylarida nechta o‘rtoqlik o‘yini o‘tkazishi, shuningdek, raqiblari rasman ma’lum qilinadi. Dastlabki ma’lumotlarga ko‘ra, “Albiseleste”ning raqiblari Markaziy Amerika terma jamoalari bo‘lishi kutilmoqda.
