Iyul oyi oxirida Italiyaning «Sassuolo» klubi va Avstraliya terma jamoasi futbolchisi Kristiano Volpatoning boshiga tushgan ko‘ngilsiz voqea haqida xabar bergan edik. Futbolchining qonida kokain aniqlangani va bu paytda uning avtomobil boshqargani unga jiddiy muammolar tug‘dirishi mumkin edi.

Biroq yakunda ish katta oqibatlarsiz yakunlandi. Volpatoga 722 Avstraliya dollari, ya’ni 450 yevro miqdorida jarima solindi.

Futbolchi kokain iste’mol qilganini qat’iyan rad etdi va qo‘shimcha ekspertiza tayinlashni so‘radi. Uning natijasi esa qonda giyohvand modda izlari yo‘qligini ko‘rsatdi, deb xabar bermoqda derbyderbyderby.it.

Bundan tashqari, «Sassuolo» ham bir qator tekshiruvlar o‘tkazdi. Shundan so‘ng klub Volpatoni oqlab, unga jamoa faoliyatida ishtirok etishga yana ruxsat berdi.