Июль ойи охирида Италиянинг «Сассуоло» клуби ва Австралия терма жамоаси футболчиси Кристиано Вольпатонинг бошига тушган кўнгилсиз воқеа ҳақида хабар берган эдик. Футболчининг қонида кокаин аниқлангани ва бу пайтда унинг автомобиль бошқаргани унга жиддий муаммолар туғдириши мумкин эди.
Бироқ якунда иш катта оқибатларсиз якунланди. Вольпатога 722 Австралия доллари, яъни 450 евро миқдорида жарима солинди.
Футболчи кокаин истеъмол қилганини қатъиян рад этди ва қўшимча экспертиза тайинлашни сўради. Унинг натижаси эса қонда гиёҳванд модда излари йўқлигини кўрсатди, деб хабар бермоқда derbyderbyderby.it.
Бундан ташқари, «Сассуоло» ҳам бир қатор текширувлар ўтказди. Шундан сўнг клуб Вольпатони оқлаб, унга жамоа фаолиятида иштирок этишга яна рухсат берди.
