Англия Премьер Лигасининг 8-туридан ўрин олган “Астон Вилла” ва “Манчестер Сити” жамоалари ўртасидаги учрашув бирмингемликларнинг 2:1 ҳисобидаги ғалабаси билан якунланди. Ушбу учрашувда Ўзбекистон миллий жамоаси ҳимоячиси Абдуқодир Ҳусанов тўлиқ 90 дақиқа ҳаракат қилди. Sofascore портали ҳимоячининг ўйиндаги ҳаракатларини 7,4 балл билан баҳолади.
Ҳусанов ўйин давомида жами 92 марта тўпга тегинди. У жами 66 та узатманинг 59 тасини аниқ амалга оширди (89 фоиз аниқлик). Эътиборли жиҳати, Ҳусановнинг ўз майдончасидаги узатмалари аниқлиги 86 фоизлик кўрсаткични ташкил этди (22 тадан 19 та аниқ). Шунингдек, рақиб майдончасига амалга оширилган 44 та узатмадан 40 таси (91 фоиз) ўз манзилига етиб борди.
Эътиборлиси шундаки, ушбу юқори кўрсаткич эвазига Ҳусанов “Манчестер Сити” ҳимоячилари орасида энг яхшиси бўлди (таққослаш учун: Марк Гехи — 5,8, Рубен Диаш — 6,6, Йошко Гвардиол — 6,5).
Абдуқодир Ҳусановнинг ҳимоядаги кўрсаткичлари қуйидагича:
- Ҳимоядаги ҳаракатлар: 16 марта;
- Тўпни муваффақиятли олиб қўйиш: 5 марта;
- Рақиб узатмасини тўхтатиб қолиш: 2 марта;
- Зарбаларни тўсиш: 1 марта;
- Ердаги курашлар: 15 марта (11 таси муваффақиятли);
- Ҳаводаги яккакурашлар: 1 марта (0 таси муваффақиятли).
Учрашувнинг энг яхши футболчиси деб ўйинда дубль муаллифига айланган “Астон Вилла” ҳужумчиси Николас Жексон топилди — 9,5 балл. “Манчестер Сити”нинг ягона голига муаллифлик қилган Эрлинг Ҳоланднинг ҳаракатлари эса 7,9 балл билан баҳоланди.
