Ruminiya futbol federasiyasi (FRF) bolalar jamoalari o‘yinlarida ota-onalar va tomoshabinlarning tajovuzkor xatti-harakatlariga qarshi kurashish maqsadida "qora kartochka" tizimini joriy qildi.
Yangi tartib uch bosqichdan iborat.
Avvalo, hakam o‘yinni vaqtincha to‘xtatib, murabbiylardan muxlislarga murojaat qilishni so‘raydi.
Agar vaziyat o‘zgarmasa, uchrashuv 10 daqiqaga to‘xtatiladi va jamoalar kiyinish xonasiga yo‘l oladi.
O‘yin qayta boshlanganidan keyin ham haqoratlar yoki jismoniy tajovuz davom etsa, hakam "qora kartochka" ko‘rsatadi va final hushtagini chaladi. Bunday holatda uchrashuv to‘liq to‘xtatiladi va uni davom ettirishga ruxsat berilmaydi.
Ushbu chora Ruminiyadagi barcha 130 ta futbol akademiyasiga tatbiq etiladi. Tizim yosh futbolchilar, murabbiylar, hakamlar va uchrashuvning boshqa ishtirokchilarini himoya qilishga qaratilgan.
