«Real» muxlislari «Rayo Valyekano»ga qarshi o‘yinda hisob 3:1 bo‘lgan paytda raqib ketma-ket hujumlar uyushtirib, «qirollik klubi» futbolchilari sarosimaga tushib qolganida jamoani hushtakbozlik bilan qarshi oldi. Uchrashuvdan so‘ng jamoa bosh murabbiyi Joze Mourinyo muxlislarning noroziligiga munosabat bildirdi.
«Men tanqidni juda yaxshi tushunaman — u asosli. Ammo men o‘nta almashtirish qila olmasdim. Valverdeni maydondan olish qarorim ehtiyot chorasi edi, unda kichik jarohat bor edi va biz unga tushadigan yuklamani to‘g‘ri taqsimlashimiz kerak.
Har doim ham yuqori pressing qila olmaymiz. Bugungi kabi o‘yinlarda jamoa tabiiy ravishda chuqurroq himoyaga o‘tib ketadi. Bunday kuchli raqibning vaziyatlar yaratishi va hatto gol urishi ham mutlaqo normal. Shunga qaramay, bu biz uchun munosib g‘alaba bo‘ldi», — deya Mourinyoning so‘zlarini Marca keltiradi.
Seshanba kuni «Real» Ispaniya chempionati doirasida safarda «Elche»ga qarshi o‘ynaydi.
