«Barselona» sobiq bosh murabbiyi Xavi Ernandes Lionel Messi nima sababdan 2023 yilda Kataloniya klubiga qaytmaganini tushuntirdi.
«Messi — mening yaqin do‘stim. Biz u bilan ko‘p gaplashganmiz. U «Barselona»ga qaytishni istardi. Men esa uning klubdagi «so‘nggi raqsi»ni tashkil qilamiz, deb o‘ylagandim.
Biz to‘rt oy davomida aloqada bo‘ldik, ammo keyin Laporta menga Messini «Barselona»ga qaytarishni istamasligini aytdi. Bu haqda Leoga aytish men uchun juda og‘ir bo‘ldi», — dedi Xavi PGX Podcast'ning yangi sonida.
Messi — «Barselona» tarbiyalanuvchisi. U 2021 yilda kataloniyaliklarning moliyaviy muammolari sabab klubni tark etib, «PSJ»ga o‘tgan edi.
2023 yilda argentinalik futbolchi Fransiya klubi bilan shartnomasini uzaytirmaslikka qaror qildi va «Barselona»ga qaytishga yaqin turgandi. Biroq yakunda u AQSHning «Inter Mayami» klubiga yo‘l oldi.
