«Milan» direktorlar kengashi klubning 2025/26 yilgi mavsum uchun moliyaviy hisobotini tasdiqladi. Klub daromadi 464,6 million yevroni tashkil etdi, bu 2024/25 yilgi mavsumda qayd etilgan rekord ko‘rsatkichdan 6 foiz kam.
Daromadning pasayishi «Milan»ning yevrokuboklarda ishtirok etmagani bilan izohlanmoqda. Shunga qaramay, tijoriy yo‘nalish rekord natijalarni qayd etdi: homiylikdan tushgan daromad klub tarixida ilk bor 100 million yevrodan oshdi.
Shuningdek, «Milan» uchrashuvlariga o‘rtacha tashrif ikkinchi mavsum ketma-ket A Seriyada eng yuqori ko‘rsatkich bo‘ldi — har bir o‘yinga 72 mingdan ortiq muxlis tashrif buyurdi.
Brand Finance ma’lumotiga ko‘ra, «Milan» brendi qiymati rekord darajadagi 514 million yevroga yetdi. Bu o‘tgan yilga nisbatan 28 foizga ko‘p. Klub 2021 yildan beri dunyoda eng tez o‘sib borayotgan futbol brendi deb e’tirof etildi.
Klubning sof zarari taxminan 24 million yevroni tashkil qildi. «Milan»da bu holat yevrokuboklarda ishtirok etilmagani bilan bog‘liq vaqtinchalik ta’sir sifatida izohlanmoqda.
Sof qarz miqdori bir yil avvalgi 92 million yevrodan 145,3 million yevrogacha oshdi. Bu investisiya dasturi va rivojlanish loyihalarini amalga oshirish bilan bog‘liq.
Klubning o‘z kapitali 176,4 million yevroni tashkil etmoqda.
