Farg‘onaning "Neftchi" klubi bosh murabbiyi Islombek Ismoilov Osiyo Chempionlar ligasi Elit turnirining 2-turidan o‘rin olgan Saudiya Arabistonining "An-Nasr" jamoasiga qarshi uchrashuv oldidan tashkil etilgan matbuot anjumanida ishtirok etdi.
O‘zbekistonlik mutaxassis raqibning imkoniyatlari, Krishtianu Ronalduga qarshi qanday harakat qilish va jamoasining bo‘lajak bahsdagi maqsadlari haqida fikr bildirdi.
"Ar-Riyodga munosib natija uchun keldik"
Ismoilov "An-Nasr"ni qit’aning eng kuchli klublaridan biri sifatida e’tirof etib, Saudiya Arabistoni jamoasiga qarshi bahs "Neftchi" uchun jiddiy sinov bo‘lishini ta’kidladi.
"Raqibimiz Osiyoning eng kuchli jamoalaridan biri hisoblanadi. Uning tarkibida jahon futbolida o‘z o‘rniga ega, yuqori saviyali va katta tajriba to‘plagan futbolchilar bor.
Albatta, bu biz uchun juda muhim uchrashuvlardan biri. Ar-Riyodga shunchaki maydonga tushib, o‘yin o‘tkazish uchun emas, balki munosib natijaga erishish maqsadida kelganmiz. Raqibning kuchini yaxshi tushunamiz, ammo o‘z imkoniyatlarimizga ham ishonamiz. Bo‘lajak bahsda bor kuchimiz, mahoratimiz va jamoaviy birdamligimizni ishga solamiz", — dedi Ismoilov.
"An-Nasr"ning kuchli jihatlari haqida
Farg‘onaliklar ustozi Saudiya Arabistoni klubi tarkibidagi futbolchilarning individual mahorati va xalqaro tajribasiga alohida e’tibor qaratdi.
Uning fikricha, raqibning yuqori saviyali ijrochilarga ega ekani "Neftchi"dan maydonda har tomonlama puxta va intizomli harakat qilishni talab etadi.
"An-Nasr" tarkibida kuchli futbolchilar jamlangan. Ularning individual mahorati va xalqaro tajribasi yuqori ekanini yaxshi bilamiz. Biroq biz ham o‘z kuchimizga ishonamiz. Raqibning ustun jihatlarini inobatga olgan holda, o‘z o‘yinimizni ko‘rsatishga intilamiz. Asosiy maqsadimiz — munosib kurashish, mazmunli futbol namoyish etish va ijobiy natijaga erishish", — dedi mutaxassis.
Ronalduga qarshi alohida taktika qo‘llaniladimi?
Matbuot anjumanida Ismoilovdan "An-Nasr"ning portugaliyalik yulduzi Krishtianu Ronalduni to‘xtatish uchun maxsus taktik reja ishlab chiqilgani haqida ham so‘raldi.
"Krishtianu Ronaldu — jahon futbolining eng yorqin yulduzlaridan biri. Uning mahorati, tajribasi va gol urish qobiliyatini alohida ta’kidlash mumkin. Biz unga katta hurmat bilan qaraymiz va imkoniyatlarini yaxshi bilamiz.
Ammo biz faqat Ronalduga qarshi emas, balki butun "An-Nasr" jamoasiga qarshi o‘ynaymiz. Shuning uchun asosiy e’tiborimizni raqibning umumiy o‘yiniga, jamoaviy harakatlariga va maydonda yuzaga keladigan vaziyatlarga qaratamiz.
Biz uchun eng muhimi — intizomli harakat qilish, murabbiylar shtabi belgilagan taktik rejaga amal qilish va jamoa sifatida o‘z salohiyatimizni namoyish etish", — dedi Ismoilov.
"Neftchi"ni jiddiy sinov kutmoqda
Farg‘ona klubi Elit OCHLning dastlabki turida Iroqning "Al-Quva Al-Javiya" jamoasini 1:0 hisobida mag‘lub etgan edi. O‘sha uchrashuvda yagona golni Zoran Marushich kiritgan.
"An-Nasr" esa birinchi turda BAAning "Al-Ayn" klubiga 0:4 hisobida imkoniyatni boy bergan. Shu bois Ar-Riyod jamoasi o‘z maydonidagi uchrashuvda musobaqadagi dastlabki ochkolarini qo‘lga kiritishga intiladi.
Eslatib o‘tamiz, "An-Nasr" — "Neftchi" uchrashuvi bugun, 12 oktyabr kuni Ar-Riyoddagi "Al-Avval Park" stadionida bo‘lib o‘tadi. Bahs O‘zbekiston vaqti bilan soat 23:15 da boshlanishi rejalashtirilgan.
