Germaniyaning «RB Leypsig» klubi UYEFA Chempionlar ligasi umumiy bosqichi 2-turida Niderlandiyaning PSV jamoasini minimal 1:0 hisobida mag‘lub etdi.
Ushbu natija «RB Leypsig» uchun o‘z maydonidagi ketma-ket to‘qqizinchi g‘alaba bo‘ldi. Mazkur seriya klub ishtirok etayotgan barcha musobaqalarni qamrab oladi va nafaqat joriy, balki o‘tgan mavsumdagi uchrashuvlarni ham o‘z ichiga oladi.
«RB Leypsig» avval ham shunday natijaga erishgan. 2020 yilda jamoa o‘z maydonida ketma-ket 9 ta o‘yinda g‘alaba qozongan edi. Shu tariqa, nemis klubi o‘z rekordini takrorladi.
Bundan tashqari, «RB Leypsig» liga doirasidagi ketma-ket to‘rtinchi uy uchrashuvida o‘z darvozasidan gol o‘tkazmasdan g‘alaba qozondi.
Bu ham klub tarixidagi yangi rekord sifatida qayd etildi.
