Bugun, 15 oktyabr kuni futbol bo‘yicha O‘zbekiston Superligasining 24-tur uchrashuvlariga start beriladi. Uch kun davom etadigan tur doirasida jami sakkizta bahs o‘tkaziladi.
Mavsumning hal qiluvchi qismi yaqinlashib borayotgan bir paytda chempionlik uchun kurash yanada qizg‘in tus olmoqda. Ayniqsa, turnir jadvalining yuqori qismidagi raqobat muxlislar e’tiborini tortmoqda.
Chempionlik poygasida ikki jamoa tenglashgan
23-tur yakunlariga ko‘ra, "Paxtakor" va "Neftchi" 52 ochkodan jamg‘arib, turnir jadvalining dastlabki ikki pog‘onasini egallab turibdi.
O‘zaro o‘yinlarda ustunlikka ega bo‘lgan "Paxtakor" birinchi, "Neftchi" esa ikkinchi o‘rinda bormoqda.
Uchinchi o‘rindagi "Navbahor" 45 ochkoga ega. Keyingi pog‘onalarni "Lokomotiv" (38), "Nasaf" (37), "Buxoro" (37) va OKMK (36) egallagan.
Turning markaziy uchrashuvi Namanganda o‘tadi
24-turning eng qiziqarli bahslaridan biri 17 oktyabr kuni "Navbahor" va "Paxtakor" o‘rtasida bo‘lib o‘tadi.
Chempionlik uchun kurashayotgan poytaxt jamoasi safarda muhim ochkolarni qo‘lga kiritishga harakat qiladi. "Navbahor" esa o‘z maydonida g‘alaba qozonib, peshqadamlar bilan oradagi farqni qisqartirish imkoniyatiga ega.
"Neftchi" ham navbatdagi turda safarda o‘ynaydi. Farg‘ona klubi 16 oktyabr kuni "Qo‘qon-1912"ga qarshi maydonga tushadi.
Superliga. 24-tur o‘yinlari taqvimi
15 oktyabr:
19:00 — "Andijon" — "Qizilqum"
19:00 — "Mash’al" — OKMK
16 oktyabr:
19:00 — "Bunyodkor" — "So‘g‘diyona"
19:00 — "Qo‘qon-1912" — "Neftchi"
19:00 — "Surxon" — "Xorazm"
17 oktyabr:
18:00 — "Lokomotiv" — "Nasaf"
19:00 — "Dinamo" — "Buxoro"
19:00 — "Navbahor" — "Paxtakor"
Quyi pog‘onalarda ham keskin raqobat
Turnir jadvalining quyi qismida ham muhim ochkolar uchun kurash davom etmoqda.
Hozirda "Qo‘qon-1912" 23, "Bunyodkor" va "Xorazm" esa 22 ochkodan jamg‘argan. So‘nggi o‘rinda borayotgan "Mash’al" hisobida atigi 4 ochko mavjud.
Shu tariqa, 24-tur uchrashuvlari nafaqat chempionlik poygasi, balki yuqori o‘rinlar va Superligada jon saqlab qolish uchun kechayotgan raqobat nuqtai nazaridan ham muhim ahamiyat kasb etadi.
