«Manchester Yunayted»ning sobiq futbolchisi Ander Errera jamoaning amaldagi sardori Brunu Fernandesh haqida fikr bildirdi.
Ispaniyalik futbolchi 2014–2019 yillarda «qizil iblislar» safida to‘p tepgan. Portugaliyalik yarim himoyachi esa 2020 yil boshida jamoaga qo‘shilgan.
«Men Fernandeshni haqiqiy yetakchi deb bilaman. U ko‘p yillardan beri, ketma-ket bir necha mavsum davomida “Manchester Yunayted”ni o‘z yelkasida ko‘tarib kelmoqda. U jamoada yolg‘iz o‘ynaydi, demoqchi emasman, ammo ba’zan klub tarixining yukini ham o‘z zimmasiga olishiga to‘g‘ri keldi», — deya 37 yoshli yarim himoyachining so‘zlarini keltiradi The Touchline.
Ayni paytda Errera «Saragosa» sharafini himoya qilmoqda.
