«Barselona» bosh murabbiyi Xans-Diter Flik jamoa qanot hujumchisi Lamin Yamal haqida fikr bildirdi. Ispaniyalik futbolchi «Betis»ga qarshi uchrashuvning eng yaxshi o‘yinchisi deb topildi. Kataloniyaliklar mazkur bahsda safarda 5:2 hisobida g‘alaba qozonishdi.
«Laminning hisobni ochgan goli ajoyib bo‘ldi. Menimcha, ayni paytda Yamal dunyoning eng yaxshi futbolchisi. Uning namoyish etgan o‘yinidan juda mamnunman.
Uning o‘yinga bo‘lgan munosabati hayratlanarli. Lamin 100 foiz tayyor holatda bo‘lganida, jamoa o‘yiniga qo‘shayotgan hissasi beqiyos darajaga yetadi.
Nega Yamalni almashtirdim? Maydondagi tortishuv va qizil kartochka bilan bog‘liq vaziyatdan keyin uni almashtirish kerak, degan qarorga keldim. Bu men uchun aniq edi. U fantastik o‘yin o‘tkazdi», — dedi Flik matbuot anjumanida.
Kelasi hafta «Barselona»ni ikkita muhim uchrashuv kutmoqda. Kataloniyaliklar Chempionlar ligasida «PSJ»ga, Ispaniya chempionatida esa Madridning «Real» klubiga qarshi maydonga tushishadi.
