«Real» himoyachisi Eder Militao uzoq muddatli jarohatdan so‘ng maydonga qaytgani munosabati bilan o‘z hissiyotlari bilan o‘rtoqlashdi.
Braziliyalik futbolchi Ispaniya chempionatining 9-turida «Sevilya»ga qarshi kechgan va madridliklarning 4:1 hisobidagi g‘alabasi bilan yakunlangan uchrashuvning 85-daqiqasida zaxiradan maydonga tushdi.
«Ushbu o‘zgacha oqshom uchun barchangizga rahmat! Shuncha vaqtlik tanaffusdan keyin maydonga qaytish va muxlislarimizdan bunday mehrni his qilish — unutilmas voqea.
Xudoga, oilamga, rafiqamga va butun jamoaga ushbu ajoyib g‘alaba uchun minnatdorchilik bildiraman.
Eng avvalo, doimo yonimda bo‘lganingiz uchun sizlarga, aziz madridistlarga rahmat! Sizlar aqlbovar qilmaydigan darajada ajoyibsizlar!» — deb yozdi Militao ijtimoiy tarmoqdagi sahifasida.
«Real» navbatdagi uchrashuvini 21 oktyabr kuni Chempionlar ligasi umumiy bosqichining 3-turida «RB Leypsig»ga qarshi o‘tkazadi. Bahs Toshkent vaqti bilan 22 oktyabrga o‘tar kechasi soat 00:00 da boshlanadi.
