Fransiyalik mashhur sobiq hujumchi Tyerri Anri «Bavariya» yulduzi Xarri Keynning o‘yiniga yuqori baho berdi. U angliyalik futbolchining nafaqat gol urish mahorati, balki maydondagi vaziyatni to‘g‘ri baholashi va jamoa manfaatini birinchi o‘ringa qo‘yish qobiliyatini ham alohida e’tirof etdi.
Keyn Chempionlar ligasi doirasida Londonning «Arsenal» klubiga qarshi kechgan va 2:2 hisobida yakunlangan uchrashuvning eng yaxshi futbolchisi deb topildi.
33 yoshli hujumchi dastlab Alfonso Devisga golli uzatma berdi, keyin esa penaltini aniq amalga oshirdi.
«Keyn shunchaki futbol o‘ynamaydi — u maydonda fikrlaydi. Bu yigitning o‘ziga xos jihatlari bor.
U vaziyatni tahlil qiladi va jamoa manfaati uchun qo‘lidan kelgan barcha ishni bajarishga tayyor. U — ajoyib futbolchi. Unda hamma narsa bor, gap faqat gol urish mahorati haqida emas. Uning aqli ham bor», — dedi «Arsenal» afsonasi CBS Sports telekanali studiyasida.
