Londonning "Arsenal" klubi vingeri Bukayo Saka jarohati sabab uzoq muddatga safdan chiqishi mumkin.
Now Arsenal nashrining xabar berishicha, angliyalik futbolchi tibbiy tekshiruvdan o‘tgan, biroq uning jarohati bo‘yicha hozircha aniq tashxis qo‘yilmagan.
Manba tiklanish muddati jarohatning og‘irlik darajasiga bog‘liq ekanini ta’kidlamoqda. Agar Sakada birinchi darajali pay cho‘zilishi aniqlansa, u taxminan ikki hafta maydonga tushmaydi.
Ikkinchi darajali uzilish tashxisi qo‘yilgan taqdirda esa futbolchining safga qaytishi Rojdestvo bayramigacha kechikishi mumkin.
Uchinchi darajali uzilish ehtimoli nisbatan past baholanmoqda. Chunki Saka uchrashuv paytida jarohat olganiga qaramay, maydonni qo‘ltiqtayoqlarsiz, mustaqil ravishda tark etgan.
Eslatib o‘tamiz, "Arsenal" hujumchisi Chempionlar ligasining "Bavariya"ga qarshi 2:2 hisobida yakunlangan uchrashuvida jarohatlangan edi.
Birinchi bo‘limda to‘pga intilib, zarba berishga uringan futbolchi shundan so‘ng o‘yinni davom ettira olmagan.
Hozircha Sakaning maydonga qaytish muddati bo‘yicha yakuniy ma’lumot yo‘q.
