«Brayton» bosh murabbiyi Fabian Xyurseler Konferensiyalar ligasi umumiy bosqichining 2-turida Chexiyaning «Yablones» klubiga qarshi o‘tkazilgan uchrashuv natijasiga munosabat bildirdi.
22 oktyabr kuni bo‘lib o‘tgan bahsda jamoalar 0:0 hisobida durang o‘ynadi. Angliya klubi ustozi shogirdlarining harakatlaridan to‘liq qoniqmaganini ta’kidladi.
«Biz o‘z imkoniyatlarimiz darajasida o‘ynay olmadik. O‘ylaymanki, «Yablones» himoyada yaxshi harakat qildi. Ular jarima maydonchasini ishonchli himoya qilishdi va himoyadan hujumga o‘tish jarayonlarida ham ancha samarali o‘ynashdi.
Albatta, bu biz kutgan natija emas. Biroq endi oldinga qarab harakat qilishimiz kerak.
Agar uchrashuv 0:0 hisobida yakunlangan bo‘lsa, demak, biz yetarlicha golli vaziyatlar yarata olmaganmiz. Bu, shubhasiz, yaxshilashimiz lozim bo‘lgan jihatlardan biri.
Biz ushbu musobaqadagi o‘yinlarning o‘ziga xos xususiyatlarini tushunib olishimiz va futbolning asosiy elementlarini bexato bajarish qanchalik muhimligini anglashimiz kerak.
Bugun aynan shu oddiy, ammo muhim jihatlarda muammolarga duch keldik. Endi ularni bartaraf etish ustida ishlashimiz lozim», — dedi Xyurseler.
