"Yuventus" bosh murabbiyi Luchano Spalletti Turin klubining Italiya chempionati turnir jadvalidagi holati haqida fikr bildirdi.
Murabbiy jamoa "Lechche"ga qarshi o‘yindagi (2:0) kabi ishonchli futbol namoyish etishi kerakligini ta’kidladi.
"Muammolarga berilib ketish o‘rniga, maqsadlarimizga erishishga yordam beradigan yechimlarni izlashimiz kerak. Bu taktik jihatdan ham, psixologik ishonchsizlikni yengish nuqtai nazaridan ham muhim. Kerakli natijalarga erishish uchun bor kuchimizni ishga solishimiz lozim", — deya Spallettining so‘zlarini keltiradi La Gazzetta dello Sport nashri.
A Seriyasining sakkizta turidan keyin "byankoneri" 14 ochko bilan turnir jadvalida yettinchi o‘rinni egallab turibdi. Spalletti boshchiligidagi jamoa keyingi uchrashuvini 28 oktyabr kuni safarda "Jenoa"ga qarshi o‘tkazadi.
