Londonning "Chelsi" klubi "Brayton" yarim himoyachisi Yasin Ayarini o‘z safiga qo‘shib olish imkoniyatini ko‘rib chiqmoqda. Bu haqda TEAMtalk nashri xabar berdi.
Manbaga ko‘ra, 23 yoshli shvesiyalik futbolchining "Brayton" bilan yangi shartnoma borasida olib borayotgan muzokaralari boshi berk ko‘chaga kirib qolgan. "Chelsi" esa ushbu vaziyatdan foydalanib, Ayarini o‘z tarkibiga jalb etishni rejalashtirmoqda.
Biroq londonliklar futbolchiga qiziqish bildirayotgan yagona klub emas. "Milan", "Galatasaroy", "Fenerbaxche" hamda Angliya Premyer-ligasining yana bir nechta jamoasi ham Ayarining holatini diqqat bilan kuzatmoqda.
Shu bilan birga, "Brayton" o‘z yarim himoyachisini qo‘yib yuborish niyatida emas va u bilan hamkorlikni davom ettirishni istamoqda. Klub shvesiyalik futbolchining transfer qiymatini taxminan 50 million yevroga baholamoqda.
Yasin Ayari joriy mavsum barcha musobaqalar doirasida 12 ta uchrashuvda maydonga tushib, 2 ta gol muallifi bo‘ldi.
