Yaqinda bo‘lib o‘tgan «el-klasiko»da «Real» safarda «Barselona»ni 2:1 hisobida mag‘lub etdi. Uchrashuvdan so‘ng yuzaga kelgan noxush hodisa sababli La Liga polisiyaga murojaat qildi.
Madridliklar ikkinchi golni nishonlayotgan paytda kataloniyalik muxlislardan biri «Real» yarimhimoyachisi Eduardo Kamavinga va uning yonidagi futbolchilarni bayroq dastasi bilan urgan.
AS nashrining xabar berishicha, polisiya «Barselona» xavfsizlik xizmati ko‘magida qoidabuzarning shaxsini aniqladi. Unga nisbatan ma’muriy ish qo‘zg‘atildi.
Muxlisga 3 mingdan 60 ming yevrogacha jarima solinishi mumkin. Shuningdek, uning sport musobaqalariga kirishiga ma’lum muddatga taqiq qo‘yilishi ehtimoli bor.
