"Manchester Yunayted" va "Yuventus" klublarining sobiq hujumchisi Karlos Teves Pol Skoulzni o‘zi birga o‘ynagan eng yaxshi futbolchi deb atadi.
Argentinalik futbolchi Rio Ferdinandga bergan intervyusida Skoulzni David Silvadan ustun qo‘ydi.
"Men uchun Skoulz eng yaxshi futbolchi", — dedi Teves.
Ferdinand unga Krishtianu Ronaldu va Lionel Messi bilan ham birga o‘ynaganini eslatganida, Teves o‘z fikrida qat’iy qoldi.
"Yo‘q, men uchun baribir Skoulz. Mashg‘ulotlarni eslaysanmi? U umuman gapirmasdi. Faqat to‘p bilan ishlagan paytida hammasi aniq edi. Mashg‘ulotlarda doimo pas, pas, pas...
Men uchun eng yaxshisi u. Andrea Pirlo va Pol Skoulz", — dedi argentinalik sobiq futbolchi.
Eslatib o‘tamiz, Teves va Skoulz 2007–2009 yillarda "Manchester Yunayted" safida birga to‘p surgan.
