"Barselona" va "Bavariya"ning sobiq hujumchisi Robert Levandovski faoliyati davomida nima uchun "Arsenal"da o‘ynamagani haqidagi savolga hazilomuz javob qaytardi.
De Marke Sports tomonidan e’lon qilingan videoda 38 yoshli polyak futbolchisiga "Nega "Arsenal"da o‘ynamagansiz?" degan savol berildi.
"Chunki men sovrinlar yutishni xohlardim", — dedi Levandovski kulib.
Suhbatdoshi "Biz hozirgina bitta sovrin yutdik!" deya javob qaytarganida, futbolchi hazilini davom ettirdi:
"Agar men o‘ynaganimda, sizlar buncha uzoq kutishingizga to‘g‘ri kelmasdi".
Eslatib o‘tamiz, Levandovski faoliyati davomida 10 marta Germaniya, 3 marta Ispaniya chempioni bo‘lgan.
Shuningdek, u "Bavariya" safida Chempionlar ligasi, UEFA Superkubogi va klublar o‘rtasidagi jahon chempionatida g‘olib chiqqan.
