«Milan» hujumchisi Kristian Pulishich A Seriyaning 10-turida «Inter» ustidan qozonilgan g‘alabadan (3:1) so‘ng o‘z hissiyotlari bilan o‘rtoqlashdi.
Derbida hisobni ochgan amerikalik futbolchi jamoasi g‘alabaga munosib o‘yin ko‘rsatganini ta’kidladi.
«Bu biz uchun juda muhim oqshom bo‘ldi. Bugungi g‘alabaga to‘liq munosib edik. Har kuni tinimsiz mehnat qilyapmiz.
Shuningdek, Kakaga men haqimda aytgan iliq so‘zlari uchun minnatdorlik bildiraman. Bu men uchun katta sharaf. U ajoyib futbolchi. Barchasi uchun rahmat», — dedi Pulishich.
Eslatib o‘tamiz, Pulishich 2023 yildan buyon «Milan» sharafini himoya qilmoqda. Milanliklar navbatdagi turda «Jenoa»ga qarshi maydonga tushadi.
