"Интер" ҳимоячиси Мануэл Аканжи "Милан"га қарши учрашув олдидан журналистлар билан суҳбатлашди. Турнир жадвали пешқадамлари чемпионатнинг бешинчи ўриндаги жамоаси билан 31 октябрь куни баҳс олиб боришади.
"Жисмонан чарчоқ ҳис қилаётганим йўқ, аввалги ўйинда бироз дам олиш имкониятига эга бўлдим. Бизнинг мақсадимиз — ғалаба қозониш. "Милан"га қарши ўйинда ҳам энг муҳими шу. Умид қиламизки, бунинг уддасидан чиқамиз", — деди швейцариялик футболчи Sky Sport Italia нашрига берган интервьюсида.
Аканжи шунингдек, жорий мавсумда "Интер"нинг ўйинларда биринчи бўлиб гол ўтказиб юбориш одати ҳақида ҳам фикр билдирди. Жамоа ўйин давомида ҳисобда ортда бора туриб, аллақачон 13 очко жамғарган.
"Нега бундай бўлаётганини тушунтириш осон эмас. Ўйинларни ёмон бошлаймиз, деб бўлмайди, аммо баъзида хатоларга йўл қўямиз ва гол ўтказиб юборамиз. Бундай қилишга ҳаққимиз йўқ, айниқса кучли жамоаларга қарши ўйинларда. Баъзан рақиб яратган вазиятларидан фойдалана олмаса, бу хатоларимиз жазосиз қолади.
"Биламизки, "Милан"га қарши ўйинни бундай бошлай олмаймиз, рақибга осон голлар уриш имконини бермаслигимиз керак. Улар гол уриш учун анча ҳаракат қилишларига тўғри келади", — дея таъкидлади ҳимоячи.
"Интер" ҳисобида 25 очко бор, "Милан" эса 18 очко тўплаган.
