Саудия Арабистонининг "Неом" клуби ҳимоячиси Натан Зезе Криштиану Роналдунинг маҳаллий чемпионат ва Франция Лига 1 даражаси ҳақидаги фикрларига муносабат билдирди.
Аввалроқ португалиялик юлдуз Саудия Арабистони чемпионатини Франция биринчилиги билан таққослаб, баҳсларга сабаб бўлганди.
"Бу ердаги футбол савияси анча паст бўлади, деб ўйлагандим. Аммо чемпионатнинг энг кучли 10-12 жамоасига қарши ўйнаганингизда, Франция Лига 1 билан жуда катта ўхшашликни сезасиз.
Саудиялик кўплаб футболчилар Европада бемалол тўп сура олади. Уларнинг маҳорати мен учун ёқимли кутилмаган ҳолат бўлди. Бу ерга келганимдан умуман афсусланмайман", — дея Зезенинг сўзларини келтиради derbyderbyderby.it.
Аввалроқ Франциянинг "Нант" клубида ўйнаган ёш марказий ҳимоячи Саудия Арабистони футболи сезиларли даражада ривожланганини эътироф этди.
Бироқ Зезе Роналдунинг қарашларига тўлиқ қўшилмайди. Унинг фикрича, айрим саудиялик жамоалар юқори савияга эришган бўлса-да, Франция Лига 1 умумий даража, трибуналардаги муҳит ва ўйин шиддати борасида ҳали ҳам устунликка эга.
