«Реал» футболчилари клубнинг "Microsoft" компанияси билан ҳамкорлик шартномаси имзоланиши муносабати билан ташкил этилган тантанали маросимда Флорентино Перес билан гаплашишди. Унда жамоа бош мураббийи Карло Анчелоттининг келажаги борасида гап борган.

"Мадрид" футболчилари, айниқса, етакчи ўйинчилар 55 ёшли италиялик мутахассис қўллаб-қувватлашган ва Анчелоттини истеъфога чиқармасликни клуб президентидан сўрашган.

«Мураббийлар ўз соҳасининг билимдони бўлишдан ташқари инсоний хусусиятларга эга бўлса, бу менга ёқади. Анчелотти шундай инсон», – деди Серхио Рамос.

«У билан ишлаётганимдан мамнунман», – деди Криштиану Роналду.

«Анчелотти юмшоқ инсон эмас. Унинг қўлостида биз Моуриньо даврига нисбатан кўпроқ ишлаяпмиз», – дейди Пепе.

«Ўйинчилар билан яқин муносабатда бўлиш Анчелоттини ўзига хос инсонга айлантиради», – деди Гарет Бэйл.

«Қарор қабул қилиш ҳуқуқи менда бўлганида, мен уни танлаган бўлардим», – деди Марсело. Тони Кроос ҳам жамоадошлари каби мураббийни қўллаб-қувватлади: «Анчелотти – чемпион».