«Барселона» ярим ҳимоячиси Хави бугун матбуот анжуманида иштирок этиб, мазкур ёзда Каталониядан кетаётганини расман эълон қилди.

«Мавсум якунланганидан кейин «Барселона»дан кетишимни эълон қилмоқчиман. Бундай қарорга келиш мен учун осон бўлмади. Ушбу мавсумда ҳам "Барселона"да ўйнаганимдан хурсандман. Ўшанда ҳам бир қарорга келиш осон бўлмаганди.

Фаолиятимни «Ас-Садд»да давом эттираман. Клуб билан шартномам 2 йилга мўлжалланган. Уни яна бир йилга узайтиришим мумкин. Шунингдек, ўзимни мураббий ва спорт директори вазифасида синаб кўриш имкониятига ҳам эга бўламан.

«Барселона» яқинда менга 2018 йилгача бўлган шартнома таклиф қилди, аммо бу вақтда мен қарор қабул қилиб бўлгандим. Қатарда мени қизиқарли лойиҳа кутмоқда. Менинг асосий мақсадим — «Барселона»га қайтиш, ахир бу менинг уйим. Мураббий сифатидами, спорт директорими, фарқи йўқ.

Мен жуда ҳам бахтлиман. Мен фаолиятимни «Барселона»да ўтказдим. Бундай фаолият ҳақида фақат орзу қилиш мумкин. Мен Лео, Андрес, Буси, Педро ва барча дўстларимни соғинаман. Лекин ҳаёт шунақа», – дейди Хави.