"Реал" президенти Флорентино Перес жамоа дарвозабони ва сардори Икер Касильяснинг клубдан кетишига изоҳ бериб ўтди.

«Икер ўз хоҳишига кўра бизни тарк этди. Ҳеч ким уни «Реал»дан кетишга мажбур қилмади. У бошқа жамоадан таклиф олганини ва биз унинг қарорини ҳурмат қилишимизни сўради. Икер фаолиятида янги босқични бошламоқчи. У ўйинчи сифатида фаолиятини "Реал"да якунлашини истардим, аммо бу унинг қарори. У билан ҳамиша яхши муносабатда бўлганмиз.

Мухлислар уни клуб тарихидаги энг муҳим ўйинчилардан бири сифатида тан олишади. Албатта, уни муносиб равишда кузатишни истардик. Биз хайрлашув баҳсини ташкил этишни истаймиз. Бу борада "Порту" билан музокара олиб боряпмиз. Балки Касильяснинг янги жамоаси билан "Бернабеу кубоги" доирасида 12 август куни ўйин ташкил этармиз.

Ушбу вазиятга танқид? Мен танқидга ўрганиб қолганман. Айрим одамлар менга ва "Реал"га зарар етказишни исташади. Бу клуб жаҳондаги энег обрўли жамоа ҳисобланади. Балки, ниманидир нотўғри қилгандирмиз, мен буни инкор қилмайман», – дейди Перес.