ФИФАнинг амалдаги раҳбари Йозеф Блаттер 20 июль куни Цюрих шаҳрида ўтказиладиган ташкилот Ижроия қўмитасининг навбатдан ташқари йиғилишида иштирок этади. У бу тадбир давомида УЕФА президенти Мишель Платини ҳамда бошқа конфедерациялар раҳбарлари билан учрашувлар ўтказишни режалаштирган.
As нашри хабар беришича, бу тадбирда кўриладиган асосий масала ФИФАнинг янги президенти учун муддатидан олдин ўтказиладиган сайлов кунини аниқлаш бўлади.
Эслатиб ўтамиз, май ойи сўнгида ФИФА тизимидан бир қанча амалдорлар пул ювиш ва 2010, 2018 ва 2022 йиллардаги мундиаллар мезбонларини аниқлаш жараёнидан порахўрликда айбланиб, ҳибсга олинганди. Шундан сўнг, 2 июнь куни Блаттер ўз лавозимини муддатидан олдин тарк этиши ҳақида маълум қилганди.
Нашр хабарига кўра, ФИФА президентлиги учун асосий нозмзодлардан бири Мишель Платини ҳисобланади ва уни 6та конфедерациянинг 4тасида тўла қўллаб-қувватлашади.
Қайд этиб ўтиш жоизки, Блаттер ташкилотни 1998 йилдан бери бошқариб келади. У 29 май куни ФИФА президентлиги учун бешинчи муддатга қайта сайланганди, лекин юқорида қайд этилган можаролат туфайли ўз ўрнини бўшатиб қўйишини эълон қилганди.
