Актёр Брэдли Купер ўз севгилиси, россиялик модель Ирина Шейкни онаси Глория Кампано билан таништирди. Бу ҳақда «Сегодня.ua» хабар бермоқда.
Фото: Сегодня.ua
Купер Лондондаги театрда «Фил-одам» спектаклидаги иштирокини якунлаганидан сўнг, актёр таътилни Шейк билан Италияда ўтказди. Европадан АҚШга қайтганидан кейинги илк дам олиш кунларида эса у Иринани онаси билан таништиришга қарор қилди.
Улар биргаликда Нью-Жерси штатидаги пляжга бориб, кунни океанда чўмилиш ва қуёш тиғида тобланиш билан ўтказди. Сўнг Купернинг онаси билан Атлантик-ситидаги балиқ ресторанида кечки овқатни тановул қилишди.
Уларга хизмат кўрсатган официант аёлнинг сўзларига кўра, таниқли меҳмонлар ресторан менюсига юқори баҳо берган, муассаса эгаси уларга уйда тайёрланган пишириқ ва музқаймоқларни тортиқ қилган.
Брэдли Купер 2015 йил мартидан бери Ирина Шейк билан учрашмоқда. Бунгача у модель Сюки Уотерхауз билан ишқий муносабатларда эди. Ирина эса беш йил давомида Криштиану Роналду билан яқин эди.
Брэдли, айниқса, 2011 йили отаси вафот этганидан сўнг, онасига қаттиқ боғланиб қолганидан келиб чиқиб, кўпчилик актёрнинг Ирина билан муносабатлари жиддий эканлиги ва шу сабабли уни онаси билан таништирганини тахмин қилмоқда.
