Мадриднинг “Реал” жамоасида ажойиб анъана мавжуд.  Яъни энг кўп учрашув ўтказган футболчи клуб сардори бўлади.  Биз “Қироллик клуби”нинг охирги 60 йилдаги 9 та сардори ҳақида тўхталиб ўтишни жоиз деб топдик.
 
Франциско Хенто
Хенто Мадридликлар шарафини 1953-1971 йиллар давомида ҳимоя қилган бўлса,  1961 йилдан бошлаб 8 йил давомида клубга сардор бўлган.  Хенто дунёнинг энг совриндор футболчиларидан бири ҳисобланади.  У “Қироллик клуби” билан 12 марта Ла Лига чемпиони бўлиб,  2 мартадан Испания кубоги ва Лотин кубогида,  бир бора Қитъалараро кубокларида зафар қучган.  Шунингдек у Чемпионлар кубогида 6 марта зафар қучган ягона футболчи сифатида тарихдан жой олган.  Иқтидорли ҳужумчи “Реал” учун 181 та гол уриб,  клубнинг энг сермаҳсул 6-футболчиси бўлиб турибди.
 
Амаро Амансио
1971 йилда Хентодан сўнг сардорлик боғичи Амансиога насиб этди ва “Қироллик клуби”га 5 йил давомида капитанлик қилди.  Амаро Мадриддаги фаолиятини 1962 йилда бошлаган эди.  У 14 мавсум давомида 471 учрашувда майдонга тушиб ўз ҳисобига 142 та гол ёздириб қўйган.  Иқтидорли ҳужумчи жамоа билан бирга 9 карра Испания чемпиони,  3 карра Испания суперкубоги соҳиби ва бир марта Чемпионлар кубоги ғолибига айланди.  1969 ва 1970 йилларда эса қаторасига икки марта Ла Лига тўпурарига аталган совринни қўлга киритди.
 
Пирри
Пирри Амансио билан бирга 12 мавсум давомида тўп сурди.  У “бланкос” таркибида 1964-1979 йилларда ҳаракат қилган бўлса,  охирги 3 мавсумида жамоага сардорлик қилди.  Пирри Мадрид суперклуби учун 561 ўйинда иштирок этиб 171 гол киритган.  У тўп сурган даврда “Реал” ҳақиқий қирол эди.  Пирри 10 марта Испания чемпиони,  4 бора Испания кубоги ва 1 марта Чемпионлар кубоги ғолиби бўлганлиги ҳам сўзимизга исбот бўла олади.
 
Карлос Сантиляна
Фаолиятини Аргентинанинг “Расинг” жамоасида бошлаб,  1 йилдан сўнг “Реал”га ўтган Сантиляна 1971-1988 йилларда ушбу клуб таркибида ҳаракат қилиб 645 учрашувда 287 гол урган.  Карлос ўша пайтлари клуб тарихидаги ди Стефанодан кейинги икинчи ўринда эди.  Афсонавий ҳужумчи фаолиятининг охирги дамларини Мадрид сардори сифатида ўтказди.  У “қаймоқранглилар” сафида  9 марта Примьерода зафар қучиб,  4 карра Испания кубоги соҳибига айланди ва икки марта УЕФА кубогида чемпионликни қўлга киритди. 
 
Мануел Санчис
Санчис 1983 йилдан бошлаб 2001 йилга қадар “Реал” таркибида 711 ўйинда майдонга тушиб 49 гол киритган.  Ману шу тариқа 9 йил давомида клуб тарихидаги энг яхши “гвардиячи” бўлиб келди.  Мадридликларнинг “5” рақамли афсонаси нақ 13 йил давомида сардорлик боғичини таққан.  Унинг қўлга киритган ютуқларига кўпчилик хавас қилади.  Икки мартадан Чемпионлар лигаси ва УЕФА кубоги ғолиби бўлган бўлса,  бир марта Қитъалараро кубогига сазовор бўлди.  Бу халқаро совринлар эди.  Ички турнирларда Санчес 8 карра Испания чемпиони,   2 карра Испания кубоги,  бир марта Испания лига кубоги ва 5 карра Испания суперкубоги ғолиби ҳисобланади!
 
Фернандо Йерро
Йерро 1989 йилда “Валядолид”дан “Реал”га келади.  У 2001 йили Санчисдан қолган сардорлик боғичини тақади ва 2 мавсум жамоага капитан бўлади.  Йерро ҳимоячи бўлишига қарамай “Реал” рақиблари дарвозасини 126 марта ишғол қилган.  Ла Лигада эса у посбонларни 102 марта ранжитишга муваффақ бўлган.  Йерро 5 карра Испания чемпиони,  4 карра Испания суперкубоги ва 1 марта Испания кубоги ғолиби,  3 карра Чемпионлар лигаси,  2 карра Қитъалараро кубоги ва 1 марта УЕФА суперкубоги ғолиблигини қўлга киритди.  Фернандо Мадридни тарк этгач Қатар ва Англия чемпионатларида тўп сурди.
 
Раул
“Реал” академиясидан чиққан энг кучли футболчи  клуб таркибида 1994 йилдан 2000 йилга қадар 741 та учрашувда майдонга тушиб ўз ҳисобига 323 та гол ёздириб қўйди.  Раул яқин яқингача Мадрид суперклуби тарихидаги энг сермаҳсул футболчи бўлиб келаётган эди.  У “Реал”га 2003 йилдан 2010 йилга қадар сардорлик қилди.  Раул “Галактикос” билан жами 16 та мусобақада чемпионликни қўлга киритди.  Унинг шахсий совринлари ҳам анчагина.  “Don Balon” ва “El Pais ” нашрлари версиясига кўра 6 мартадан Испанияда “Йил футболчиси”,  3 марта Европанинг энг яхши ҳужумчиси,  2 мартадан Ла Лига ва Чемпионлар лигаси тўпурари бўлди.  
 
Икер Касильяс
Касильяс 1999-2015 йиллар давомида Мадридликлар дарвозасини 723 ўйинда ҳимоя қилиб ўз дарвозасидан 748 та тўп олиб чиққан.  Албатта унинг ўтказиб юборган голлари кўпроқ.  Бироқ у ўйнаган пайтларда “Реал”нинг ҳимояси Бенитес давридагидек доимо мустаҳҳкам бўлмаган.  Каска Раул кетгач ундан қолган боғичга беш йил эгалик қилди.  Икер “галактикос” билан 19 та турнирда зафар қучди.  2008 йилдан 2012 йилгача кетма-кет 5 мавсум ИФФҲС версияси бўйича энг яхши дарвозабон бўлди.  Шунингдек у 21 та шахсий совринга эга чиқди.
 
Серхио Рамос
Касильяс “Реал”дан кетгач,  мадридликлар таркибида энг кўп ўйин ўтказган футболчи Рамос бўлиб қолди ва натижада сардорлик маъсулиятини унинг бўйнига тушди.  Серхио 2005-йили “Севилья”дан сотиб олинган эди.  Ўшандан буён ҳимоячи Мадридликлар сафида 450 ўйинда майдонга тушиб 50 дан ортиқ голларга муаллифлик қилди.  Серхионинг қўлга киритган совринлари юқоридаги жамоадошлариникига қараганда бироз камтарроқ.  У 3 марта Ла лига чемпиони,  2 мартадан Испания кубоги ва суперкубоги ғолиби,  бир мартадан Чемпионлар лигаси,  УЕФА суперкубоги ва қитъалараро кубоги ғолибига айланган. 
 
 Фурқат Юсупов