2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларида футбол бўйича ўтказиладиган мусобақалар тақвими эълон қилинди.    Унга кўра мусобақани 3 август куни аёллар ўртасида “Е” гуруҳи вакиллари бошлаб берадилар. Рио-де-Жанейро шаҳридаги “Олимпия” стадионида ўтказиладиган ушбу ўйин маҳаллий вақт билан соат 13:00да бошланади.    Чорак финал учрашувлари 12 август куни Бразилиа, Сальвадор, Сан-Паулу, Белу-Оризонти шаҳарларида бўлиб ўтади. Ярим финал ўйинлари 16 август санасида ўтказилади. Финал йўлланмаси учун ўтказиладиган баҳслар Белу-Оризонти, Рио-де-Жанейро (Маракана) шаҳарларида бўлиб ўтади.    Ва ниҳоят, финал учрашуви 19 август куни Рио-де-Жанейро шаҳридаги “Маракана” стадионида ўтказилади. Шу куни Сан-Паулу шаҳрида 3-ўрин учун ўйин бўлиб ўтади.      Эркаклар ўртасида баҳслар 4 август куни пойтахт Бразилиада бошланади. 17 август куни ўтказиладиган чорак финал ўйинларига Бразилиа, Сальвадор, Белу-Оризонти, Сан-Паулу шаҳарлари мезбонлик қилади.    Ярим финал баҳслари 17 август куни Сан-Паулу ва Рио-де-Жанейро (Маракана) шаҳарларида ўтказилади. Ҳал қилувчи финал учрашуви Рио-де-Жанейро шаҳридаги “Маракана” стадионида бўлиб ўтади. Шу куни Белу-Оризонтида бронза медаль эгаси аниқланади.    Эслатиб ўтамиз, Олимпиада ўйинлари дастуридан ўрин олган футбол мусобақалари Бразилиянинг олти шаҳрида жойлашган еттита стадионида бўлиб ўтади. Булар, Белу-Оризонти, Бразилиа, Манаусе, Сальвадоре ва Рио-де-Жанейро (“Маракана” ва “Олимпия” стадионлари) шаҳарларидир.     Шавкат Жалилов