ЖЧ-2018 саралаш босқичи доирасида Ўзбекистон ва Шимолий Корея терма жамоалари ўртасидаги ўйиндан кейинги матбуот анжуманининг иккинчи қисмида Самвел Бабаян иштирок этди.

"Кеча ўйинолди матбуот анжуманида рақибни яхши ўрганиб чиққанимизни айтиб ўтгандик. Биз рақибнинг тактикаси, ўйинга ёндошув ва тайёргарлик жараёни, уларнинг фалсафасинги яхши ўрганиб чиққандик. Улар оддий тактика орқали қандай қилиб ижобий натижаларни қўлга киритаётганига аҳамият қаратдик.

Ўз навбатида ўзимизнинг йигитларга ҳам ўзимизнинг ўйин фалсафамизни тушунтириб, характеримиз ва менталитетимизга мос ўйнаш кераклигини ўргатдик. Худди кореяликлар сингари бизнинг футболчилар ҳам тўла куч ва жонбозлик билан ўйнашди. Шукр, режамиз иш берди.

Ўтказиб юборилган голда концентрацияни бироз йўқотиб қўйдик. Шундан кейин ўз ўйинимизни ўйнай бошладик. Тезкор паслар орқали ҳужумлар ташкил қилдик.  Кореянинг 9-рақамли ҳужумчиси майдонни тарк этиши биз учун ёқимли сюрприз бўлди. У майдонни тарк этганидан кейин рақибнинг хавфли жиҳати қолмади.

Жамоамизнинг барча чизиқлари юқори савияда ўйнади. Футболчилар бир-бирларини тушуниб ҳаракат қилишди. Агар қаердадир хато қилган бўлса, бу рақибнинг маҳорати эвазига юзага келди. Агар яратган имкониятларимизнинг барчасидан фойдалана олганимизда ҳисоб янада йирик бўлиши мумкин эди.

Биз ўзимизнинг ўйин услубимизни яратишда давом этяпмиз. Бу барча терма жамоаларимизга жорий қилиняпти", - дейди Самвел Бабаян.