Ўзбек футболи тарихидаги энг яхши дарвозабон ким экани ҳақида гап кетганда ҳеч иккиланишсиз ҳамма Игнатий Нестеров номини тилга олса керак. Зеро Нестеров охирги 10 йиллик ичида Ўзбекистон миллий терма жамоасининг биринчи рақамли посбони бўлиб келди ва у ўнлаб муҳим ва қийин учрашувларда миллий терма жамоамиз жонига аро кирди. Буни ҳар бир ўзбек футбол ишқибози жуда яхши билади.

Аммо сўнгги пайтларга келиб барчамиз гувоҳи бўлаётганимиздек, Игнатий Нестеров кўпинча терма жамоа захира ўриндиғидан жой ола бошлади. Хўш, бу нима билан боғлиқ экан? Нестеровга жиддий рақобатчи пайдо бўлдими? Ёки чиндан Игнатнинг ёши ўтиб қолдими? Қуйида шу саволга жавоб излашга ҳаракат қилиб кўрсак…

Игнатий Нестеров жорий мавсум аввалида жиддий жароҳат олди. Хатто дастлаб унинг бутун бошли бир мавсумни майдондан ташқарида ўтказиб юбориши тахмин қилинганди. Аммо тажрибали посбон ўзида куч топа олди ва икки ойдаёқ сафга қайтди. Лекин Вадим Абрамов жароҳатдан тузалган Игнатий Нестеровни ҳадеб асосий таркибда майдонга туширавермади. “Локомотив” жамоаси дарвозасини кўплаб ўйинларда Маъмур Икромов қўриқлади. Шубхасиз, бу Нестеровдек ўта маҳоратли ва шу билан биргаликда кўп йиллар давомида фақат асосий таркиб аъзоси бўлиб келган дарвозабонга руҳий жиҳатдан ҳам таъсир этгани тайин. Оқибатда Нестеров жорий йилги мавсум давомида Олий Лиганинг аксарият учрашувларини захира ўриндиғидан кузатишга мажбур бўлди.

Шундай бўлсада, миллий терма жамоамизнинг собиқ бош мураббийи Миржалол Қосимов улкан тажрибага эга бўлган Игнатий Нестеровга ишонч билдиришда давом этди. Аммо Ўзбекистон терма жамоаси бошқарувини Самвел Бабаян қўлга олгач Игнатий чиндан захира дарвозабонига айланиб қолди. Зеро охирги учрашувларнинг барчасида Александр Лобанов бошланғич таркибда майдонга тушмоқда.

Бабаяннинг ҳам нега бундай йўл тутаётганини тушуниш мумкин. Зеро Лобанов сўнгги йилларни айнан Самвел Бабаян кўз олдида ўтказди ва терма жамоамиз устози ушбу голкипернинг салоҳиятини ва нималарга қодир эканини жуда яхши билади. Қолаверса, Бабаян ўз клубида ҳам доимий ўйин амалиётига эга бўлмаётган Нестеровни майдонга тушуриб, таваккал қила олмайди. Натижада сиз-у биз билган, барчамиз меҳр қўйган Игнатий Нестеров захира дарвозабонига айланиб бормоқда.

Бу ҳолат кўплаб мухлис-у мутахассисларга бошида маъқул тушмади. Боиси барчамиз охирги 10 йил давомида бош жамоамиз дарвозасида фақат Нестеровни кўришга ўрганиб қолгандик. Энди эса миллий термамиз дарвозасини муҳим ўйинларда бошқа бир посбон қўриқламоқда. Буни қабул қилиш қанчалик қийин бўлмасин, кўникишга мажбурмиз. Зеро ҳар қандай футболчи фаолиятида ҳам қачондир бундай “шўнғиш”лар бўлиши тайин. Барча ҳам қарийди, ёши ўтгач эса маҳорат қанчалик юксак бўлмасин, жисмоний жиҳатдан 90 дақиқа юқори даражада ўйин кўрсатишнинг имкони бўлмай қолади.

Игнатий Нестеровда ҳам худди шу жараён кузатилаётган бўлса ажаб эмас. Зеро Игнат 32 ёшни қаршилашга улгурди. Бу ёшда юқори даражада ҳаракат қилиш эса осон эмас. 2002 йилдан буён Ўзбекистон терма жамоаси сафига жалб этиб келинаётган посбон аллақачон 92 та ўйин ўтказишга улгурган. Бу эса тақсинга сазовор натижадир! Зеро 13 йил давомида юқори савияни ушлаб туриш учун чиндан профессионал бўлиш талаб этилади.

Шубхасиз, аллақачон ўзбек футболи тарихидаги энг яхши дарвозабон номини ўзиники қилишга улгурган Игнатий Нестеровнинг яна бир неча мавсум давомида фаолият юритиши тайин. Ишонамизки, Игнат ҳали терма жамоа таркибидаги 100-юбилей учрашувини ҳам ўтказади. Лекин вақт олий ҳакам! У ҳеч кимни аяб ўтирмаслиги аниқ. У кўпчиликка кутилмаганда марра яқин эканини кўрсатиб қўяди. Истардикки, Игнатий Нестеровнинг финиши ҳали келмасин, Игнат ўзи орзу қилганидек мундиалда майдонга тушиш бахтига муяссар бўлсин! Ўзбек футболида эса Нестеровдек жонкуяр ва фидоий дарвозабонлар - Игнатий Нестеровнинг издошлари кўпайсин! Ишончимиз комил, бундан миллий футболимиз фақат ютади!..