Ла Лига 16-туридан ўрин олган "Райо Валекано"га қарши учрашувда "Реал" футболчилари сўнгги бор 2014-йилги клублараро Жахон чемпиони рамзи туширилган либосларда майдонга тушадилар. Сабаби мазкур учрашувдан бир неча соатлардан сўнг Японияда клублараро янги Жахон чемпиони номи маълум бўлади ва мазкур белги ўша жамоа либосларидан ўрин эгаллайди.

Таъкидлаш жоизки, мазкур нишон "Реал Мадрид" учун футбол оламида қора кунлар билан ёдда қоладиган бўлди. Ёдингизда бўлса Жахон чемпиони рамзи туширилган футболкаларда илк бор "Валенсия"га қарши майдонга тушилган ва мағлубиятга учралган ҳолда кетма-кет 22 учрашувли ғалабали серияга якун ясалган эди. Мавсум якунига келиб эса барча совринлар бой берилган. 

Бундан ташқари жорий мавсум ҳам жамоанинг ишлари жойида эмас. Ҳатто ушбу муваффақиятсизликларга ҳамоҳанг ҳолда "Реал" ўз тарихида илк бор Қирол кубогидан дисквалификация сабаб четлатилди ва битта совриндан ҳозирнинг ўзида маҳрум бўлди.