Бугундан бошлаб “Локомотив”нинг Оиё чемпионлар лигасидаги рақиблари ҳақида маълумотлар бериб борамиз. Маълумки, жамоамиз ОЧЛда “А” гуруҳидан жой олган ва “Ал Наср” (БАА), “Сепахон” (Эрон) ҳамда “Ал Иттиҳод” (С.Арабистони)/”Ал Виҳдат” (Иордания) жуфтлиги ғолибига қарши баҳс олиб боради.

Кеча “Сепахон” сафарда “Падидеҳ” меҳмони бўлиб, 1:1 ҳисобида дуранг ўйнади. “Сепахон”нинг ушбу ўйиндаги таркиби ҳақида ҳозирча маълумот йўқ. Фақат шуниси аниқки, бу жамоадан Меҳди Шарифи гол муаллифи бўлган. Эрон чемпионатида 16та жамоа иштирок этади. 15-тур ўйинларидан сўнг “Сепахон” 22 очко билан 8-ўринда боряпти.

ОЧЛда “Локомотив”га рақиб бўлиши мумкин бўлган жамоалардан бири “Ал Иттиҳод” эртага навбатдаги тур учрашувини ўтказади. Бу жамоа 14 декабрь куни сафарда “Ал Наср”га қарши майдонга тушиб, 0:3 ҳисобида ютқазиб қўйди.

Эртага эса “Ал Иттиҳод” ўз майдонида “Ал Таавон”ни қабул қилади. Саудия чемпионатида 14та жамоа иштирок этади. “Ал Иттиҳод” 11-тур якунларига кўра, 20 очко жамғариб 4-ўринда боряпти.

Ҳозиргина БАА чемпионатида “Ал Наср”нинг ўйини тугади. Бу жамоа ўз майдонида “Ал Шааб” билан куч синашиб, 5:1 ҳисобида ғалаба қозонди. Мазкур учрашувда “Ал Наср”нинг бразилиялик легионери Нилмар учта гол урди.

БАА чемпионатида 14та жамоа қатнашади. “Ал Наср” 12 учрашувдан сўнг 24 очко билан учинчи ўринда боряпти.