Фахрий Андреа Пирло айни пайт Поль Погба кўрсатаётган умумий савиядан ҳайратда. Умуман, «Нью-Йорк-Сити» клуби аъзоси Погбани ўзи билан бирга ўйнаган ёш футболчилар орасида энг кучлиси, дея таърифлайди. Чунончи, франциялик йигит охирги бир неча ҳафта давомида яна ажойиб спорт формасига кириб, «Ювентус»нинг скудетто учун курашга қайтишида муҳим роль бажарди. Тушунарлики, ҳар қандай салоҳиятли ёш футболчини чинакам юлдузлар билан таққослаб кўришади. Хусусан, кўплаб ёшларни Пирлога ўхшатишади. Дейлик, Поль Погбани ҳам кўпинча айнан Андреа билан таққослайдилар. Аммо италиялик фахрийнинг ўзи бошқача фикрда: унинг айтишича, ҳозирда «МЮ»нинг собиқ ўйинчисига тенг келадигани йўқ.
- Фаолиятингиз давомида кўплаб ёш истеъдодлар билан бирга ўйнагансиз. Улар орасида Поль Погба ҳаммадан яхшироқ таассурот ўйғотгани ростми?
- Ҳа. У мен кўрган ёшларнинг энг яхшиларидан бири. Илк машғулотдаёқ сафимизга ажойиб футболчи қўшилганини тушунган эдик. Тўғри, Поль жуда озғин эди, аммо узун оёқлари ёрдамида бир зумда майдоннинг турли бурчакларида пайдо бўларди. Энди эса Погба жисмонан улғайиб, қувватга тўлди.
- Бошидаёқ Погбага сизнинг ўринбосарингиз сифатида қарашган. Шунингдек, Данило Каталади ва Марко Верраттига ҳам шундай нисбат беришган. Хўш, бу масалада шахсий фикрингиз қандай: қайси футболчи сизга кўпроқ ўхшайди?
- Каталади бошқача, у асосан 2та жарима майдони оралиғида тўп суради. Верратти ҳам менга ўхшамайди. Лекин ўйлайманки, у яқин 20 йил ичида Италия термасида муносиб ўйнай олади.
- 1995 ва 2016 йиллар футболи, хусусан, кийиниш хонасидаги муҳит ўртасида қандай фарқ бор?
- Эҳ, кўп нарса ўзгарди. Авваллари ёш футболчилар оғиз очишга ҳам чўчишарди. Негаки, катталар барчасини назорат қилишарди. Дейлик, бирор футболчи сирға тақиб келса, уни олиб ташлашга мажбур этишарди. Ёхуд сочини узайтириб юборган футболчини дарҳол тартибга солишарди: ўз жойида қўлга қайчи олишарди ва...
- Ҳозир қандай?
- Эндиликда ёш йигитчалар асосий жамоа машғулотларида иштирок этишяпти ва «Барчасига эришиб улгурдим», деб ўйлашади. Гўёки, асосий таркибга қўшилишлари билан барча нарса мумкиндай...
- Нима, ҳозирги ёшлар орасида чинакам профессионаллар йўқми?
- Бор, лекин саноқли. Дейлик, Даниэле Ругани ва Федерико Бернардески ҳам жиддий йигитлар.
- Италия термаси 2020 йилга бориб, қандай кўриниш олишини тасаввур қилиш қийин.
- Ҳа, шундай. Менимча, Ругани жамоада ўз ўрнига эга бўлади. Алессио Романьо-ли, Доменико Берарди, Бернардески, Маттиа де Шильо ва Верратти ҳам.
- Роландо Мандрагор, Стефано Сенси ва Стефано Стураро ҳақида нима дея оласиз?
- Мандрагор 2014 йилиёқ бизга қарши ўйинда чакки кўринмаганди. Сенси ҳақида ҳам кўп гапиришяпти, аммо мен Стурарони яхшироқ биламан. У майдонга кўп тушмаётган бўлсада, охирги мавсумда яққол ўсишга эришди. Кўпинча Италияда ёшларга имконият берилмаслигини айтишади. Лекин мана, Жанлуижи Доннаруммага қаранг. Демоқчиманки, агар муносиб бўлсанг, майдонга албатта, тушасан.
- Жорий мавсум яна кимлар эътиборингизни тортмоқдалар?
- Менга «Эмполи»даги Ассане Диуссенинг ҳаракатлари ёқяпти. Ярим ҳимояда ўйнаш учун шундай характер керак.
- Сиз тилга олган аксарият футболчилар аввалига «В» сериясида ўйнашган...
- Айни пайт «В» серияси бу масалада «С» сериясига ўхшаб қолди. Зеро, авваллари ёш футболчиларни тажриба оширишлари учун учинчи дивизионга юборишарди. Иккинчи томондан, кичик клублар маблағ тежаш билан оворалар. Яъни ўз тарбияланувчиларини оёққа турғазиш учун пул ажратишмаяпти, ҳисоб. Аслида бунинг тескариси бўлиши керак.
- АҚШда эса болалар футболига сармоя киритиш масаласида муаммо йўқ. Хўш, америкалик ёшлар ҳақидаги фикрингиз қандай?
- Йигитлар университетдаги таҳсилдан кейин дарҳол MLSда ўйнай бошлашади. Лекин улар тактик томондан яхши шаклланишмаган, яна техник қобилиятлари паст. Шунга қарамай, охирги йилларда футбол АҚШда ҳаттоки, баскетболдан ҳам ўзиб кетиб, энг оммавий спорт турига айланди.
- Дейлик, сиз болалик йиллари асосан қаерда ўйнардингиз?
- Мактаб майдонида. Ҳаттоки, якшанба кунги ибодатдан сўнг ҳам у ерда тўпланардик.
- Қизиқ, сизни яқин вақт оралиғида мураббий сифатида кўрамизми?
- Бу ҳақда ҳали жиддий бош қотирганим йўқ. Зеро, яна 2 йиллик шартномам бор ва уни тўлиқ адо этмоқчиман.
- Айтишларича, вақтида уйингизда кўнглингиз тусаган ишни қилишингизга рухсат беришган экан...
- Шундай. Мисол учун, тўпни ертўла деворига тепиб, машқ қилардим. Битта сир: менга жарима зарбалари устида ишлашимда диван анча қўл келарди. Яъни тўпни унинг устидан ошириб ташлашга уриниб, буни қойилмақом даражада ўзлаштиргандим...
Манба: Football.ua,
А. АҲМЕДОВ тайёрлади
