«Лестер» жамоаси ҳужумчиси Жейми Варди Футбол журналистлари ассоциацияси талқинига кўра мавсумнинг энг яхши футболчиси деб эълон қилинди. Бу ҳақда жамоа расмий сайтида хабар берилган.

«Тулкилар» ҳужумчиси учун инглиз журналистларининг 36 фоизи овоз берган, у бу борада Риёз Маҳрез ва Н'Голо Кантени ортда қолдирган.

Варди АПЛнинг жорий мавсумида 34 учрашувда майдонга тушди ва 22та гол урди. У ўз голлари билан жамоанинг олтин медаллар учун юришида катта ҳисса қўшди.

Жейми Варди — «Лестер»нинг 1948 йилдан буён (жамоа ташкил топганига 68 йил бўлди) бундай мукофотга лойиқ кўрилган илк футболчисидир. Ўтган йилда бу мукофот «Челси» футболчиси Эден Азарга топширилганди.

«Бундан олдин шу мукофотга сазовор бўлган жуда кўп буюк футболчилар қаторига кириш менга катта фахр туйғуларини беради. Ассоциацияга ва мен учун овоз берганларнинг барчасига раҳмат. 

Шунингдек, менинг ютуқларимда ўз ҳиссасин қўшган жамоадошларимга миннатдорчилик билдираман. Бу «Лестер» учун жуда ажойий мавсум бўлди, мувафаққиятларимиз асосида бир кишининг эмас, жамоанинг барча аъзоларининг меҳнати ётибди.

Мураббийга, жамоа тизимидаги ходимларга ва барча мухлисларга раҳмат. Биз кейинги икки ҳафта давомида ҳам ўз ишимизни қилишда давом этамиз.

Умид қиламанки, терма жамоам сафида ҳам Европа чемпионати вақтида ўзимни кўрсатаман», – деган Варди.