Машҳур хўроз Балтазар УЕФА қарорига кўра Евро-2016 ўйинларига кириш имкониятидан маҳрум қилинди деб хабар беради AFP.
Балатазарнинг эгаси Клеман Томашевски стадионга паррандаси билан кириш учун рухсат олишга уриниб кўрди. Бироқ УЕФА унга: "Сиз хўроз билан Евро-2016 ўйинларига кира олмайсиз. Стадионга ҳайвонларнинг киритилмаслиги хавфсизлик нуқтаи назаридан муҳимдир" - деб жавоб берди.
"Жудаям хафаман. Мен 68 ёшга кирдим, балки бу чемпионат мен учун охиргисидир. Чиптам бор, лекин Балтазарни стадионга киритишмаса, мен ҳам бормайман" - деди аламзада Томашевски.
Эслатиб ўтамиз, Клеман ва унинг хўрози 1998 йилдан бошлаб машҳур бўлиб кетишди. Франция телевидениеси уларни ЖЧ ўйинлари пайти фаол равишда намойиш қилиб турди. Фаранглар жаҳон чемпионлигини қўлга киритгач, Балтазар терма жамоанинг норасмий тимсолига айланди.