«Барселона» ҳужумчиси Луис Суарес клубдоши Лионель Месси Аргентина терма жамоасидаги фаолиятини тугатиш қароридан қайтади. 

Эслатиб ўтамиз, аргентиналик 29 ёшли футболчи АҚШда ўтган Америка Кубоги—2016 баҳсларидан сўнг миллий Аргентина терма жамоасидаги фаолиятини якунлаганини эълон қилган эди. 

«Аргентинанинг мағлубияти билан тугаган финалдан сўнг, ҳозир Мессини қўллаб-қувватлаш зарур. Умид қиламанки, у миллий терма жамоани тарк этмайди. Дўст ва унинг мухлиси сифатида у терма жамоада қолишини хоҳлайман», — деди уругвайлик Суарес.

«Аслида Испания Мессини ўз таркибига қўшиб олишни хоҳлагани, уни ёшлар терма жамоасига таклиф этгани ҳақида кўп гап-сўзлар бўлиб ўтди. Бироқ у Аргентинани танлаган ва ватанига нисбатан муҳаббатига шубҳа қилиб бўлмайди», — деди Луис Суарес. 

«Албатта, юз берган воқеаларнинг бари унинг учун оғир кечди, бироқ, ўйлайманки, у ўз қароридан қайтади», — дея қўшимча қилди Уругвай терма жамоаси ва «Барселона» клуби ҳужумчиси Луис Суарес.