Бугунги кунда кўплаб мухлис ва мутаҳассисларни футбол учрашувларида видео такрорлардан фойдаланиш фикри икки томонга бўлиб қўйди.
Бу янгиликка қарши инсонлар видео такрорлар футболдан тезлик ва жозибани олиб қўяди деб ҳисобласа, Видео такрорлар жорий қилиниши қўллаб қувватловчилар бунга ҳакамлар ишини осонлаштирувчи ва ўйин шаффофлигини таъминловчи жиҳат сифатида қарашмоқда.
Футбол учрашуви вақтида видео такрорлардан фойдаланиш ғояси бугун пайдо бўлмади. Техник жиҳатдан бу ғояни амалга ошириш мумкин бўлган вақтдан бери, учрашувлардаги баҳсли вазиятларда видео такрордан фойдаланиш ҳақида фикрлар янгай бошлади. Халқаро Футбол Уюшмаси – ФИФАга Жанни Инфантино президент этиб сайлангач эса, бу борадаги фикрлар назариётдан амалиётган яъни - футбол майдонига кўчиб ўта бошлади.
Видео такрорларни майдонда синаб кўришда дастлаб америка футбол лигаси – МЛС фаоллик кўрсатди. Умуман АҚШда энг оммабоп спорт турларининг барчасида видео такрор кўп йиллардан бери муваффақиятли қўлланиб келинади.
ФИФА видео такрорларни синовдан ўтказиш ҳақида қарор қабул қилганида, синов ишлари икки йил давомида, аста-секин йўлга қўйилишини кўзда тутган эди. Ҳозирга келиб бу борада анча катта қадамлар ташланмоқда дейиш мумкин. Жумладан, жорий йилнинг 8-18 декабр кунлари Япония мамлакатида бўлиб ўтадиган клублар ўртасидаги Жаҳон чемпионатида ҳам видео такрорлар синовдан ўтади. Мазкур турнирда ҳамюртимиз Равшан Эрматов айнан видео такрорлар бўйича маъсул ҳакамлардан бири сифатида иштирок этади. Демак, воқеалар ривожини кузатиб борамиз ва ушбу янгилик футболга қандай таъсир қилишини билиб оламиз.
