"Ливерпуль"нинг собиқ футболчиси Жейми Каррагер "Челси" яримҳимоячиси Оскарнинг "Шанхай СИПГ" клубига ўтишига муносабатини билдирди.

Норасмий манбаларга кўра, хитойликлар бразилиялик футболчига 350 минг фунт (400 минг евро) ҳафталик маош таклиф қилишган.

"Агар футболчи пул туфайли клубини ташлаб кетса, бу бутун футбол учун қайғули. У пуллар жуда катта, аммо Оскар "Челси"да чақага ўйнамаётган эди. Бу унинг фаолиятида олдинга қадам эмас. У Хитой футболининг ривожи ҳақида, Виллаш-Боаш билан бирга ишлаш ҳақида, ўзининг ёқимли ҳиссиётлари ҳақида гапириши мумкин, аммо биз бунинг лоф эканлигини биламиз.

У пул туфайли ўтяпти, бу ягона сабаб. Футболчилар одатда 30 ёшдан кейин шартномадаги суммага қарайдилар. Мен 30 ёшли футболчини тушунишим мумкин, аммо 25 ёшли футболчининг пул учун ўз фаолиятини, обрўли совринлар учун курашни ташлаб кетиши уятдир", - дейди Каррагер.