Россиянинг «Матч-ТВ» нашри энг катта маош олувчи 10 нафар футболчи номини келтириб, уларнинг дастлабки икки нафари Хитой Супер лигасида тўп суришига ойдинлик киритди.
Яқиндагина «Шанхай Шенхуа» футбол клуби билан шартнома имзолаган Карлос Тевес ҳафтасига 615 минг фунт маош олади. Бу эса аргентиналик ҳужумчи ҳар йили ўз клубидан 32 миллион фунт санаб олишини билдиради.
Ўзбекистонлик футболчи Одил Аҳмедов билан бирга тўп сурадиган Оскар рўйхатнинг иккинчи поғонасидан жой олди. Шанхай шаҳрининг бошқа бир клуби «Шанхай СИПГ» сафига қўшилган бразилияликнинг ҳафталик маоши 400 минг фунтни ташкил қилади. Бу эса дунёнинг энг яхши икки футболчиси сифатида эътироф этиладиган Криштиану Роналду ва Лионель Мессидан кўп деганидир.
Мос равишда Роналду ва Месси ўз клубларидан йиллик 19 миллион фунт маош олади. Бу ҳафтасига 365 минг фунтга тўғри келади.
Энг катта маошли футболчилар:
Карлос Тевес — «Шанхай Шенхуа» (ҳафтасига 615 000 фунт)
Оскар — «Шанхай СИПГ» (400 000)
Криштиану Роналду — «Реал Мадрид» (365 000)
Лионель Месси — «Барселона» (365 000)
Гарет Бэйл — «Реал Мадрид» (346 000)
Халк — «Шанхай СИПГ» (317 000)
Аксель Витсель — «Тяньцзинь Цюаньцзянь» (294 000)
Поль Погба — «Манчестер Юнайтед» (290 000)
Неймар — «Барселона» (289 000)
Грациано Пелле — «Шандонг Лунен» (260 000)
Уэйн Руни — «Манчестер Юнайтед» (260 000).
