Эртага — 31 январь куни Қаршининг «Насаф» футбол клуби учун янги мавсум расман старт олади. Европадаги йиғини доирасида Европанинг олти клубини мағлуб этган Рўзиқул Бердиев жамоаси Осиё Чемпионлар лигасининг ўтиш босқичида Баҳрайннинг «Ал-Ҳидд» клубига қарши майдонга тушади.

Учрашув учун чипталар сотувга чиқарилган бўлиб, улар секторига қараб 15 ва 35 минг сўмдан «Бунёдкор» кассаларида сотилмоқда. Чунки ўйинга айнан шу стадион мезбонлик қилади ва у 16:00 да старт олади.

Кеча — 29 январь куни Баҳрайннинг «Ал-Ҳидд» клуби Тошкентга етиб келди. Мазкур жамоа «Бунёдкор» академиясига қарашли стадионда машғулот олиб боришга ҳам улгурди.

Маълумот учун, «Ал-Ҳидд» Баҳрайн чемпионатининг 9-туридан сўнг турнир жадвалида 7-ўринни эгаллаб турибди. Баҳрайн Премьер-лигасида ўзи 10 та жамоа чемпионлик учун кураш олиб боради.

Осиё Чемпионлар лигаси

Ўтиш босқичи
31 январь, сешанба

«Насаф» (Ўзбекистон) — «Ал-Ҳидд» (Баҳрайн)

Бош ҳакам: Гамини Нивон Робиш (Шри-Ланка)
Қанот ҳакамлари: Локу Удаякантҳа, Веллабада Прималал (иккиси Шри-Ланка)
Тўртинчи ҳакам: Ражакришна Кутиаппа Ражаратнам (Шри-Ланка)
Учрашув назоратчиси: Умар Мусо Абу Лум (Иордания)
Учрашув комиссари: Талал Али Алсвайлмин (Иордания)