Бугун Жанубий Корея терма жамоасининг германиялик бош мураббийи Ули Штилике ўз дам олиш муддатини якунлаб, Германиядан Сеулга етиб келди. У Инчон аэропортида корейс ОАВларига интервью берди.

Дастлаб корейслар 23 март куни Хитойга сафар қилишади. Ушбу ўйинда Англия премьер-лигасида тўп сурувчи Ки Сонг Йонг (“Суонси”) ва Сон Хеунг Мин (“Тоттенҳэм”) терма жамоага ёрдам бера олмайди. Бу муаммони қандай ҳал қилишига қизиққан корейс нашрларига немис мутаҳассиси шундай жавоб берди:

“Мен доим айтганман: ўйинга туша олмайдиган футболчиларни эслаб, афсусланишдан кўра ўйинга чанқоқ футболчиларни тайёрлашни ўйлаш керак. Қўл остимдаги бор футболчиларни “жанг”га тайёрлайман. Бизда руҳий устунлик бор. Жароҳат олганлар ҳам сафимизга қайтиб қолар. Хитой сафари оғир кечишини биламан. Аммо мен шогирдларимга ишонаман. 2 йилдан бери терма жамоада ишонч билан бошқаряпман. Бундан кейин ҳам шундай бўлади”.

Терма жамоанинг кейинги ўйинлари ҳақида фикр билдираркан Ули Штилике шундай деди:

“Менинг жамоам ҳар қандай ўйинга 3 очкони қўлга киритиш учун тушади. Шу вақтга қадар осон эришган ғалабамиз йўқ. Гуруҳимиздаги бошқа жамоалар ҳам шундай қийин ўйинлар ўтказмоқда. Лекин Ўзбекистонга қарши ўтадиган гуруҳдаги сўнгги ўйинга қадар ЖЧ йўлланмасини нақд қилишни режалаштиряпмиз. Мен бу йил ҳам терма жамоа билан улкан ютуқларни қўлга киритиш учун қайтиб келдим. Ҳар гал Кореяга келганимда ўзимда янги режалар пайдо бўлади ва мен ушбу ниятларимга эришиш умидидаман”.

Корейс ОАВ маълумотлари асосида Отабек Йўлдошев тайёрлади.