Bugun Janubiy Koreya terma jamoasining germaniyalik bosh murabbiyi Uli Shtilike o‘z dam olish muddatini yakunlab, Germaniyadan Seulga yetib keldi. U Inchon aeroportida koreys OAVlariga intervyu berdi.

Dastlab koreyslar 23 mart kuni Xitoyga safar qilishadi. Ushbu o‘yinda Angliya premyer-ligasida to‘p suruvchi Ki Song Yong (“Suonsi”) va Son Xeung Min (“Tottenhem”) terma jamoaga yordam bera olmaydi. Bu muammoni qanday hal qilishiga qiziqqan koreys nashrlariga nemis mutahassisi shunday javob berdi:

“Men doim aytganman: o‘yinga tusha olmaydigan futbolchilarni eslab, afsuslanishdan ko‘ra o‘yinga chanqoq futbolchilarni tayyorlashni o‘ylash kerak. Qo‘l ostimdagi bor futbolchilarni “jang”ga tayyorlayman. Bizda ruhiy ustunlik bor. Jarohat olganlar ham safimizga qaytib qolar. Xitoy safari og‘ir kechishini bilaman. Ammo men shogirdlarimga ishonaman. 2 yildan beri terma jamoada ishonch bilan boshqaryapman. Bundan keyin ham shunday bo‘ladi”.

Terma jamoaning keyingi o‘yinlari haqida fikr bildirarkan Uli Shtilike shunday dedi:

“Mening jamoam har qanday o‘yinga 3 ochkoni qo‘lga kiritish uchun tushadi. Shu vaqtga qadar oson erishgan g‘alabamiz yo‘q. Guruhimizdagi boshqa jamoalar ham shunday qiyin o‘yinlar o‘tkazmoqda. Lekin O‘zbekistonga qarshi o‘tadigan guruhdagi so‘nggi o‘yinga qadar JCH yo‘llanmasini naqd qilishni rejalashtiryapmiz. Men bu yil ham terma jamoa bilan ulkan yutuqlarni qo‘lga kiritish uchun qaytib keldim. Har gal Koreyaga kelganimda o‘zimda yangi rejalar paydo bo‘ladi va men ushbu niyatlarimga erishish umididaman”.

Koreys OAV ma’lumotlari asosida Otabek Yo‘ldoshev tayyorladi.