Ла-Коруньяда бўлиб ўтган "Депортиво"га қарши ўйинда каталонияликларга жисмоний куч, ҳиссиётлар ва ғалабага бўлган ташналик етишмади. "ПСЖ"га қарши ўйинда ҳаракат қилган футболчиларнинг 4 нафари асосий таркибга киритилди. Захира футболчилари эса юқори савия намойиш қила олишмади.
"Депор" футболчилари Мессини жуда яхши ёпишга муваффақ бўлишди. Унинг бир ўзи ҳеч нарса қила олмади. Боз устига, бугунги ўйинда Неймарнинг йўқлиги ҳам билинди.
Аксинча, "Депортиво" ҳимояга ётмади, ғалабага бўлган кучли иштиёқ намойиш қилди. Улар бурчак тўпидан 2 марта самарали фойдаланишди ва 3 очкони қўлга киритишди. Тўғри, иккинчи бўлим бошида "кўк-анорранглилар" Луис Суареснинг голи эвазига ҳисобни тенглаштиришганди. Улар ҳеч бўлмаганда дурангга эришишлари ҳам мумкин эди. Аммо ўйин сўнгида уругвайлик ҳужум яқин масофадан берган зарбани Херманн Люкс оёғи билан қайтаришга муваффақ бўлди.
Шу тариқа, "Барселона" Ла лигада муҳим бўлган 3 очкони йўқотди. "Реал" ушбу турда ғалаба қозонса, жадвалда яна 1-ўринга кўтарилиб олиши мумкин.
Испания чемпионати, 27-тур, 20:15
ДЕПОРТИВО – БАРСЕЛОНА 2:1 (1:0)
Голлар: 1:0 – 40 Хоселу, 1:1 – 46 Суарес, 2:1 – 74 Бергантиньос.
Депортиво – Люкс, Аррибас, Альбентоса, Наварро, Хуанфран (Лауре, 86), Бергантиньос, Борхес, Фажр, Гама (Какута, 71), Хиль (Чолак, 62), Хоселу.
Барселона – тер Штеген, Маскерано, Пике, Альба, Андре Гомеш (Ракитич, 58), Серджи Роберто, Денис Суарес (Пако Алькасер, 77), Бускетс, Туран (Иньеста, 58), Месси, Суарес.
Огоҳлантиришлар: Наварро (14), Хоселу (36).
