17 май куни Озарбойжон пойтахти Боку шаҳрида ўтказилаётган «Ислом бирдамлиги спорт ўйинлари»нинг олтинчи кунги мусобақаларида Ўзбекистон делегацияси бир қанча медалларни қўлга киритди.
Оғир атлетика спорт турида, 105 килограммгача вазн тоифасида Ўзбекистон шарафини ҳимоя қилаётган Иван Ефремов учинчи натижани (380) қайд этди ва бронза медали билан тақдирланди. Турнирнинг олтин ва кумуш медаллари мос равишда эронлик ва ироқлик спортчилар Барорий Муҳаммадризо (395) ҳамда Салвон Алайфурийга (391) насиб этди.
105 килограмдан ортиқ вазн тоифасида Рустам Жангабаев даст ва силтаб кўтаришда энг яхши натижани кўрсатиб (431), олтин медалга сазовор бўлди. Иккинчи ва учинчи ўринларни эронлик Ҳумоюн Теймурян (414) ва Рамин Рабифарадонбеҳ (399) эгаллади.
Енгил атлетика паралимпиячилари ўртасида 100 м масофага югуришда иштирок этган Мансур Абдурашидов маррага иккинчи бўлиб келди ва кумуш медаль соҳибига айланди.
Юнон-рум курашида, 98 кг вазн тоифасида гиламга чиққан Рустам Ассакалов мусобақанинг бронза медални қўлга киритди. У покистонлик рақиби Разани 9 сонияда мағлуб этди. 59 кг вазнда Исломбек Баҳромов финалда Қирғизистон вакили Канибек Жолчубековга ютқазди ва кумуш медаль билан кифояланди.
Таэквондо WTF спорт турида, 67 кг вазн тоифасидаги Нигора Турсунқулова биринчи баҳсда покистонлик Асия Батулни енгди, аммо финал учун баҳсда озарбойжонлик Фарида Азизовага 0:3 ҳисобида ютқазди ва бронза билан кифояланадиган бўлди.
80 кг вазн тоифасида Максим Рафалович бронза медалини қўлга киритди. У биринчи баҳсда қатарлик Али Аларминийни енгганди, ярим финал баҳсида туркиялик спортчи Юнус Сарига 5:7 ҳисобида имкониятни бой бериб қўйди.
Айни вақтда Ўзбекистон делегацияси жамғарган жами медаллар сони 41та (8та олтин, 11та кумуш, 22та бронза). Ўзбекистон 34 давлат иштирок этаётган турнирда медаллар ҳисоби бўйича Туркия, Озарбойжон ва Эрондан кейин тўртинчи ўринда. Турнирда қатнашаётган терма жамоаларнинг 29таси камида битта медаль олган.
