Ҳозирда Кей-лигадаги "Гангвон" клубида тўп сураётган Ли Кун Хо Ўзбекистон билан боғлиқ яхши хотираларга эга. У 2008 йили Сувонда ўтган Жанубий Корея - Ўзбекистон (3:0) ўйинида 2та гол киритган, 2012 йили эса "Улсан Хёндэ" сафида ОЧЛ чоракфинал ўйинида Ўзбекистоннинг кучли клуби ҳисобланган "Бунёдкор" дарвозасини ҳам ишғол этган.

Ли Кун Хо ҳозирда терма жамоаси таркибида Тошкентда машғулот ўтказмоқда. Кореянинг "Newsis" нашрига ўз фикрларини билдираркан Ли Кун Хо шундай деди: "Албатта, эски хотираларни эслаш ёқимли. Ўзбекистон аввалгидан кучайган. Лекин ошиб бўлмайдиган тоғ эмас".

Жамоанинг нималарга эътибор бериши лозимлигини айтаркан: "Руҳий устунлик муҳим. Биз ҳам, Ўзбекистон ҳам бир ўйиндаги мағлубият билан ҳаммасидан айрилишимиз мумкин. Шундай экан ҳамма нарса бу ўйинга тикилган", — деди Ли Кун Хо. "Бу ерга 26 футболчи келдик. Шулардан 14тасигина майдонга тушиши мумкин. Ким майдонга тушса ҳам борини бериб ўйнаши лозим".

Отабек Йўлдошев
Жанубий Корея, Сеул